Nënkryetari i Kuvendit, Myslim Murrizi ka dalë në një konferencë përpara gazetarëve ku ka komentuar aktualitetin politik në vend por nuk ju ka shpëtuar pyetjeve konkrete që kanë të bëjnë me vendimin e Metës për ç’dekretimin e zgjedhjeve si edhe për qëndrimin që do të mbajë opozita parlementare për nismën e qeverisë për shkarkimin e Presidentit.
Duke folur për këtë, Murrizi tha se i bënte thiorrje Ramës që të vazhdojë përpara me ndryshimin e sistemit zgjedhor në bashkëpunim me opozitën e re dhe të mos e mbajë njërin sy hapur nga Lulzim Basha.
Murrizi tha gjithashtu se, Shqipëria është Republikë Parlamentare dhe jo presidenciale, e për rrjedhojë sipas tij, vendimet kalojnë përmes Parlamentit, duke lënë të kuptohet se nëse Rama bashkëpunon me opozitën e re për ndryshimin e reformës zgjedhore, do të ketë mbështetjen e kësaj të fundit për shkarkimin e Metës.
“Nëse Rama e ka të sinqertë që nuk çon letër të shtatë, të fillojë të tregojë me fakte që kërkon bashkëpunimin e kësaj pjese të opozitës që është sot në parlament. Ta fillojmë me reformën zgjedhore dhe për plotësimin e vakancave të institucioneve, edhe në KQZ. Kryetarët e partive janë kthyer në pronarë. Fakti që në institucionet kushtetuese siç janë KQZ dhe avokati i Popullit qëndrojnë në karrige persona që janë pjesë e marrëveshjes së 17 Majit, tregon se në çfarë situate ndodhemi. Nuk jemi as Republikë Presidenciale as Monarki Parlamentare.
Ne i qëndrojmë kauzës sonë për të cilët unë, zonja Hajdari por edhe zoti Koka e të tjerë që jemi ulur në ato karrige për një kauzë që ka të bëjë me sistemin, dhe konkretisht me sistemin zgjedhor ku gjithçka ndodh sot është pasojë e tij. Nëse Rama kërkon ndryshimet siç thotë ti lërë serenatat poshtë dritares së Bashës dhe të fillojë konsultimet dhe hapat konkret për ndryshimin e sistemit zgjedhor. Zanafilla e asaj që po ndodh ka nisur që në vitin 2008 me ndryshimet që u bënë në Kodin Zgjedhor”, tha Murrizi.
Pyetje: Si e komentoni nismën e mazhorancës për shkarkimin e presidentit?
Murrizi: Ne nuk jemi pjesë e marrëveshjes së 17 majit, unë jam si një deputet që përfaqësoj kauzën e sistemit të ri zgjedhor. Asnjë nga ato karriget e Kuvendit nga 2009 nuk janë zgjedhur nga populli.
Pyetje: A e zgjidh krizën ikja e presidentit ?
Murrizi: Unë nuk jam babai i Kushtetutës. Në fakt e kam dëgjuar shpesh fjalën dekretim por ç’dekretim nuk e kam dëgjuar ndonjëherë. Por në Kushtetutë shkruhet qartë se jemi Republikë Parlamentare dhe vendimet i merr Parlamenti.
Pyetje: A do ketë zgjedhje me 30 Qershor?
Murrizi: E kam thënë që të ketë zgjedhje duhet të ketë alternativë, por votime do të ketë.
Pyetje: A do jetë opozita e re unision në qëndrimin e shkarkimit të Presidentit?
Murrizi: Besoj isha i qartë, ata janë deputetë të lirë dhe të pavarur dhe mund të ikenë secili kanë qëndrimet e tyre.
(F.GJ/FAXXWEB.AL)
Discussion about this post