Ish-trajneri i Kombëtares shqiptare, Giani De Biasi, u përfshi në një debat në “Radio Kiss Kiss Napoli”, me gazetarin Paolo Del Genio, ku tema e diskutimit kishte të bënte me faktin, që a është favorizuar skuadra e Juventusit këtë sezon.
De Biasi ndau mendimin që te Napoli nuk do të ankohen më shumë se sa duhet, sepse i heqin përgjegjësinë lojtarëve.
“Unë mendoj se sezoni i Napolit ishte shumë pozitiv. Napoli ka treguar futbollin e bukur të zakonshëm të tyre. Por më lejoni gjithsesi t’ju jap një këshillë. Unë mendoj se ju ankoheni shumë më tepër se duhet. Duke folur gjithmonë për gjyqtarët dhe për episode të dyshimta, i hiqni përgjegjësinë lojtarëve”, deklaroi De Biasi.
Nuk mungoi reagimi i gazetarit Del Genio, i cili kundërshtoi komentin e De Biasit.
“Mister, unë ju vlerësoj shumë si trajner, por këtë radhë nuk mund të jem dakord me ju. Një gazetar i mirë duhet të analizojë faktet, të denoncojë gjërat që nuk shkojnë. Mos më thoni se Juventusi nuk është favorizuar në këtë sezon. Ky është realiteti, është e kotë të mohohet!”, iu kundërpërgjigj gazetari.
