Pas një jave të plotme polemika në barazimin kundër Partizanit në “ Elbasan Arena”, Skëndërbeu do të udhëtojë drejt Vlorës për të sfiduar Flamurtarin dhe për të mbajtur vendin e parë në rënditje. Korçarët hasën mjaft vështirësi në ndeshjen e parë ku mezi siguruan fitoren, Agostineli kërkon që të mos vlerësohet kjo ndeshje edhe pse vlonjatët janë në krizë:
“Çdo ndeshje ka karakteristikat e saj. Tradita na tregon që për ne Flamurtari është një kundërshtar i vështirë pasi na ka krijuar probleme. Jemi përgatitur si zakonisht, me shumë dëshirë për të zhvilluar një ndeshje pozitive”.
Italiani e ka pranuar se kjo javë ishte e pazakontë që kulmoi me vendimin e Komisonit të Disiplinës që e dënoi Skëndërbeun me tre ndeshje pa tifozë dhe ndjehet keq që nuk do e ketë mbështetjen e tifozerisë në ndeshjet e ardhsme në Korçë.
“Nuk jam unë njeriu i duhur për të bërë komente rreth kësaj çështjeje. Nga ajo që unë pashë, tifozët tanë janë viktimat e vetme të kësaj ngjarjeje. Ndeshjet me Partizanin janë përherë të tensionuara. E përsëris është se ajo që ka ndodhur tashmë nuk më intereson. Ne kemi mbyllur fazën e parë në vendin e parë të klasifikimit dhe duam të qëndrojmë deri në fund në këtë pozicion. Përsa më përket, mund të them se nëse në fillim të sezonit do të më thonin se do të qëndronim në krye, do të ishim të kënaqur. Më vjen keq që nuk do të kemi mbështetjen e tifozëve për tre ndeshje sepse kjo do të peshojë te skuadra. Është një vendim i padrejtë”.
Agostineli ka folur edhe rreth akuzave të Partizanit për ekipin juglindor.
“Më duhet të them se kur shfletoj gazetat, shikoj vetëm fotot dhe nuk arrij të kuptoj saktësisht atë që shkruhet. Mua më duhet të rithesoj se mendoj që tifozët tanë u sulmuan dhe nuk janë ata që provokuan. Unë qëndroj në pankinë dhe nuk e di se çfarë ka ndodhur jashtë stadiumit”.
Ndërsa në fund ka folur edhe për takimin që ka bërë Ardian Takaj me lojtarët dhe stafin para ndeshjes.
“Presidenti na karikoi. Na ka theksuar se do diçka më shumë nga skuadra. Ne pikët i kemi grumbulluar por kemi ende shumë gjëra për të përmirësuar. Ishte një takim mes stafit dhe lojtarëve, ashtu siç nddh rëndom në çdo familje”, kështu e mbyll intervistën për “SuperSport”, Agostineli.