Në muajin Korrik 2017 numërohen 199 aksidente rrugore. Në krahasim me Korrik 2016, numri i aksidenteve është rritur me 7,6%, njoftoi sot INSTAT.
Numri i të aksidentuarve është 272 persona nga 281 që ishte një vit më parë.
Në shtatëmujorin e 2017, numri i të aksidentuarve është ulur 4,0%, krahasuar me të njëjtën periudhë të një viti më parë.
Numri i personave të vdekur gjatë muajit Korrik 2017 është 22. Krahasuar me mesataren e personave të vdekur gjatë vitit 2016, ky numër është ulur me 1,9%.
Në Korrik, aksidentet rrugore, në 81,9% të rasteve, kanë ndodhur si pasojë e sjelljes së drejtuesit të mjetit.
Numri më i lartë i aksidenteve është kryer nga grupmosha 25 – 35 vjeç, duke zënë 26,6% të numrit të aksidenteve rrugore dhe duke u rritur me 17,8%, në krahasim me një njëjtën periudhë të një viti më parë.
Në shtatëmujorin e 2017, aksidentet rrugore të cilat kanë ndodhur si pasojë e sjelljes së drejtuesit të mjetit, zënë 80,2% të rasteve.
Numri më i lartë i aksidenteve është kryer nga grupmosha 25 – 35 vjeç duke zënë 28,0% të numrit të aksidenteve rrugore dhe duke ulur me 5,5% me njëjtën periudhë të një viti më parë.
Në Korrik 2017, numri i të aksidentuarve për 100.000 banorë ishte afërsisht 9 persona.Krahasuar me mesataren e vitit 2016, ky numër u rrit me 17,2%.
Ministria e Transporteve, në një analizë të posaçme për sigurinë rrugore në vend, pohon se rritja e numrit të mjeteve rrugore pa u paraprirë nga planifikime të mirëfillta të zonave urbane, dhe në mungesë të faciliteteve për këmbësorët dhe çiklistët, çon në rritjen e rrezikut të tyre në përfshirjen në aksidente rrugore dhe uljen gjithnjë e më shumë të numrit të udhëtimeve të pamotorrizuara dhe të transportit publik.
Vitin e kaluar, 719 persona u përfshinë në aksidente të rënda rrugore, kur 269 prej tyre humbën jetën.
Ministria e Transportit analizon se aksidentet rrugore me vdekje, në rastet më të shumta kanë ndodhur gjatë ditës, në rrugë të drejtë, të thatë dhe të asfaltuar, si dhe 59,8% në zonat urbane.
Shkaqet kryesore të ndodhjes së aksidenteve rrugore janë shpejtësia mbi normat e lejuara, tërheqja e vëmendjes gjatë drejtimit të mjetit, besimi i krijuar mbas një periudhe 9-vjeçare në drejtim mjeti dhe moszbatimi i rregullave të qarkullimit nga këmbësorët me mjete me moshë relativisht të madhe./Monitor
