Pas arrestimit të dy drejtuesve të mjeteve që i morën jetën 9-vjeçarit në Bërxullë, mësohet që një prej tyre ka qenë nën efektin e alkoolit.
63-vjeçari me inicialet N.A duke drejtuar “Toyota”-n i dehur është përplasur me mjetin “Dacia” të drejtuar prej 30-vjeçarit me inicialet E.H.
Njoftimi i policisë:
Në vijim të informacionit paraprak të dhënë ditën e djeshme në lidhje me aksidentin e ndodhur në Bërxullë, specialistët e Qarkullimit Rrugor arrestuan shtetasit N. A., 63 vjeç, banues në Kodër Kamzë, dhe E. H., 30 vjeç, banues në Paskuqan.
Shtetasi N. A., duke drejtuar automjetin tip “Toyota”, në gjendje të dehur, është përplasur me automjetin tip “Dacia”, me drejtues shtetasin E. H. Nga përplasja automjeti tip “Toyota” ka dalë nga rruga dhe është përplasur me murin e një lokali duke aksidentuar një shtetas të mitur 9-vjeçar. I mituri nga dëmtimet e marra ka ndërruar jetë në vendngjarje.
Materialet i kaluan Prokurorisë, për veprime të mëtejshme procedurale.
