Alvaro Morata i ka thënë “po” Milanit dhe është gati të veshe fanellën e kuqezinjve në sezonin e ardhshme. Ky është informacioni që ka publikuar sot e përditshmja italiane “La Gazzetta dello Sport”, e cila ka bërë të ditur se sulmuesi spanjoll ka gjetur gjuhën e përbashkët sa i përket akordit financiar.
Futbollisti kishte kërkuar disa ditë të mendohej para se të kthente përgjigje ndaj ofertës që i kishin bërë italianët dhe më në fund, dje u është përgjigjur pozitivisht atyre. Palët kanë një akord paraprak për një pagë prej 7,5 milionë eurosh neto në sezon.
Por ky është vetëm hapi i parë. Milani tani duhet të bindë Realin e Madridit për të lënë lojtarin të largohet. Morata është lojtar stoli te madrilenët, por ata nuk kanë ndër mend ta lënë të largohet për një shifër të ulët.
Në mediat italiane flitej për një ofertë prej 60 milionë eurosh që Milani kishte bërë gati për të siguruar transferimin e futbollistit dhe tani pritet të mësohet nëse madrilenët do ta pranojnë.
