Të kursyerit për pleqërinë ende nuk është pjesë e kulturës së shqiptarëve. Banka Botërore, e cila i referohet Global Findex të vitit 2014, në një studim të fundit të saj, vëren se vetëm 10% e familjeve në Shqipëri mendojnë për pleqërinë duke kursyer për të. Në vendet e varfëra, jo më shumë se 8% kursejnë për këtë fazë moshe.
Shqipëria renditet ndër vendet me popullsi relativisht të re, që konsiderojnë të pazakontë të kursejnë për pleqërinë. Sipas studimit, janë vendet me popullsi të plakur, ato që priren më tepër për të kursyer.
“Përqindja e të rriturve, të cilët kursejnë për moshën e vjetër është 22% në Bjellorusi, 18% në Hungari, dhe 15% në Federatën Ruse. Por në vendet me popullsi relativisht të re, kursimet për pension janë relativisht të pazakonta. Vetëm 5% e të rriturve në Republikën e Kirgistanit, dhe vetëm rreth 10% në Shqipëri dhe Turqi, kursejnë për moshën e vjetër.”, shkruan “Monitor”.
Studimi parashtron nevojën për të rritur kursimet e daljes në pension në rajon. Banka Botërore thekson se “kursimet e ulëta mund të rrisin vulnerabilitetin dhe të krijojnë një ekspozim më të lartë ndaj krizave të mundshme”.
Si pasojë e plakjes së popullsisë në rajonin e Ballanit dhe Europës Qendrore, skemat e pensioneve po shkojnë drejt rënies, ndaj BB sugjeron që politikanët në krye të qeverive të vendeve të gjejnë mënyra të reja për tu kujdesur për të moshuarit.
Mesatarja e kursimit për moshën e vjetër në rajon është vetëm 12%, shifër më e ulët se gjysma e këtij treguesi në vendet e zhvilluara.
