Barcelona do të jetë finalistja e parë e Kupës së Mbretit në Spanjë. Ajo arriti t’ia dalë përballë Atletikos së Madridit me një barazim të vuajtur në ‘’Camp Nou’’ me rezultatin 1-1, por I mjaftoi pasi kishte fituar ndeshjen e parë me rezultatin 1-2.
Përballja në “Kamp Nou” dhuroi gjithçka: gola, lojë të bukur, penallti të shënuara, penallti të humbura, luftë sportive dhe tre kartonë të kuq e tetë të verdhë.
U duk se goli i Luis Suarezit dy minuta para pushimit (i 107-ti në 127 ndeshje) do ta mbyllte çështjen e kualifikimit, mirëpo ekipi i Diego Simeones nuk u dorëzua.
Në të 57-n Serxhi Roberto u përjashtua me kartonin e dytë të verdhë, ndërsa 12 minuta më pas i njëjti ndëshkim u dha edhe për Karraskon, duke barazuar numrin e lojtarëve në fushë.
Dhjetë minuta para fundit Kevin Gameiro çoi dëm mundësinë më të mirë për të barazuar, duke goditur traversën nga pika e penalltisë.
Gjithsesi, sulmuesi francez e korrigjoi gabimin pas tri minutash, kur shtyu topin në rrjetë pas një pasimi të Antuan Grizhmanit.
Goli i Atletikos e ndezi akoma më tepër sfidën, ndërsa përjashtimi i Suarezit me dy të verdhë brenda tri minutash (87’, 90’) i dha më tepër besim skuadrës bardhëkuqe.
Megjithatë, as shtatë minutat e shtesës nuk i mjaftuan Atletikos të shënonte golin që do ta çonte takimin në shtesë.
Barcelona do ta mësojë sot kundërshatren e saj nga fituesja e sfidës Alavesh-Selta Vigo. (E.K/SHUPLAKA)
Discussion about this post