Në një takim informal me gazetarët kreu i SPAK, Altin Dumani foli për disa nga çështjet më të nxehta të drejtësisë shqiptare. Këto muaj ka pasur zhvillime sa i përket disa aferave që nga sterilizimi e deri tek fondet IPARD. E më pas për të vazhduar për Fredi Belerin, Amant Josifin, ish-zv.kryeministrin Arben Ahmetajn dhe së fundmi tek dosja “Mc Gonigal”.
Për Amant Josifin, ai tha se është arrestuar në kuadër të një procedimi nga Spanja, dhe se SPAK ka bashkëpunuar, por lidhur me faktin nëse ka çështje të hapur në Shqipëri, Dumani shtoi se “nuk na tremb Amant Josifi dhe asnjë i ngjashëm, kush do qoftë, nëse do kemi diçka konkrete, gjithsecili do japë llogari”.
Lidhur me kallëzimin për çështjen McGonigal, Dumani tha se çdo informacion dhe e dhënë e publikuar në media, është në vëmendjen e SPAK.
Lidhur me kërkesën zyrtare të PD, sipas përcaktimeve ligjore si palë kallëzuese, do të ketë përgjigje brenda kohës së duhur dhe në mënyrën e duhur.
