Debat në studio: Krasniqi: Marrëdhëniet me ndërkombëtarët, më të mira se kurrë. Rakip: Deklaratat tregojnë ndryshe

I ftuar në intervistën e Fax News, analisti Agim Krasniqi foli rreth situatës aktuale në Kosovë.

Krasniqi u shpreh se tashmë situata në Kosovë ndodhet në një fazë tensionesh, dhe kjo falë mosmarrëveshjeve përsa i përket çështjes së dinarit.  Ai tha se edhe pse pas këtyre problemeve, pala serbe nuk e ka mirëpritur as vetë propozimin e Lajçak.

Ai shtoi se Bashkimi Europian është treguar vazhdimisht i pafuqishëm, sepse ka qenë vazhdimisht i njëanshëm.

I pyetur nga gazetari Albi Rakip nëse ndërkombëtarët kanë çështje personale me kryeministrin Kurti, duke qenë se pas lloj-lloj sulmesh, ata përsëri kanë mbështetur Serbine, Krasniqi u përgjigj:

“Raportet e qeverisë së Kosovës dhe Bashkimit Europian janë në një ngërç në komunikim. Megjithatë, marrëdhëniet nuk i kemi pasur kurrë më mirë se sot..” 

Rreth kësaj ideje, Rakip nuk ishte absolutisht dakord, duke e mbështetur argumentin e tij në faktin se, ashtu si të gjithë e dimë, deklaratat e ndërkombëtarëve kanë treguar të kundërtën.

Krasniqi u kundërpërgjigj duke thënë: “duhet të shohim më shumë veprimet sesa deklaratat e aktorëve ndërkombëtar. Kemi shtrirë sovranitetin e plotë në të gjithë territorin e Kosovës. Situata po lëviz pozitivisht për Kosovën“.