DETAJET/ Dëmet në Tiranë nga moti i keq, te Komuna e Parisit shembet streha e çatisë, një 36-vjeçar dëmtohet në kokë

Tirana këtë të diel është “pushtuar” nga moti i keq, ku era e fortë ka mbizotëruar gjithë ditën. Për pasojë, nuk kanë qenë të pakta dëmet materiale. Para pak minutash në lagjen “Ali Demi” u rrëzua një pemë dhe shkëputi kabujt elektrikë, duke lënë kështu zonën për disa çaste pa energji elektrike.

Pemë të rrëzuara ka edhe tek “Coin”, tek rruga Perlat Rexhepi, në Kinostudio dhe në Laprakë. Përveç pemës, për shkak të erës janë shembur edhe shtylla të tensionit të lartë, ndërsa situata duket disi më e rëndë tek Komuna e Parisit, pasi është rrëzuar streha e një çatie dhe ka dëmtuar disa mjete.

Sakaq, deri tani një 36-vjeçar në rrugën 21 Dhjetori është dëmtuar në kokë për shkak të shembjes së një llamarine dhe po merr ndihmën mjekësore të nevojshme.

Dëmet në Tiranë nga moti i keq:

-Lagja Ali Demi, rruga Milot Shutku është rrëzuar një pemë dhe ka shkëputur kabujt elektrikë.
– Te sheshi “Skënderbej” është rrëzuar pema e Vitit të Ri.
– Tek “Coin” është rrëzuar një pemë dhe ka bllokuar rrugën.
-Rruga e Durrësit përballë “Mullirit të vjetër, ka rënë një antenë nga pallati dhe një shtyllë betoni.
-Mbas Presidencës te pallati që është duke u ndërtuar, disa skela i kanë rënë sipër një mjeti.
-Te Komuna e Parisit te pallatet 2 katëshe përballë “Oslos”, është shembur një pjesë e strehës së çatisë dhe ka dëmtuar disa mjete.
-Rruga Perlat Rexhepi, ka rënë një pemë dhe ka bllokuar rrugën.
-Afër Parlamentit tek shkolla pedagogjike është rrëzuar një shtyllë e tensionit të lartë.
-Rruga Hafiz Ibrahim Dalliu, ka rënë një panel i madh nga pallati dhe ka bllokuar rrugën .
-Rruga Bill Klinton, ka rënë një shtyllë nga era dhe ka dëmtuar një mjet të parkuar.
-Në Kinostudio te kopshti 55 është rrëzuar një pemë e madhe dhe ka bllokuar rrugën.
-Tek Rruga 21 Dhjetori është paraqitur shtetasi Ervin Halili 36 vjeç, i dëmtuar në kokë nga një llamarinë që ka rënë si pasojë e erës.
-Rruga Beqir Luga pallati 25, ka rënë një llamarinë dhe ka dëmtuar një mjet.
-Rruga Sadik Petrela, ka rënë një tabelë rrugore dhe ka dëmtuar një mjet.
-Në Laprakë tek Gjykata e Shkallës së Pare ka rënë një pemë dhe ka dëmtuar telat elektrike.

(M. I./ Faxweb.al)