Partia Demokratike ka dënuar ngjarjen e ndodhur sot në qytetin e Korçës, ku një qytetar është dhunuar nga ana e gardës dhe e policisë, për shkak të deklaratave të bëra ndaj kryeministrit Rama. PD e ka cilësuar këtë ngjarje si një “dhunim të një standardi të shenjtë, siç është liria e mendimit të personit”. Sipas partisë opozitare, ajo që ka bërë Rama ngjan sikurse veprimi i byroistëve të dikurshëm.
“Partia Demokratike dënon me forcë dhunimin e qytetarit Niko Dinko në Korçë, i cili shprehu sot lirinë e mendimit përpara Edi Ramës. Por, fjalët nuk i kanë pëlqyer kryeministrit dhe kjo ishte arsyeja se përse qytetari është rrahur nga ana e policisë dhe e gradës. Është e trishtë sesi në këtë ngjarje të denjë vetëm për byroistët e dikurshëm, Edi Rama edhe në vigjilje të Krishtlindjes, nuk përçon mesazhin e paqes dhe të bashkimit, por të dhunës, përçarjes dhe të ndëshkimit të njerëzve për mendimet e tyre”, thuhet në deklaratën e PD-së.
Ndërkohë, PD ka kërkuar hetim të plotë dhe angazhim serioz të Prokurorisë për këtë ngjarje të rëndë, për të vënë përpara ligjit ata që kanë dhunuar qytetarin, shkelësve më të mëdhenj të lirive të mendimit. (E.K/SHUPLAKA)
