Shumë të rinj dhe të reja duan të jenë pjesë e strukturave të Policisë së Shtetit. Por çfarë duhet të bëjnë për ta arritur këtë? Çfarë studiohet në Akademinë e Policisë? Përgatitja fizike, psikologjike etj.
Për të gjithë këto pyetje ju vjen në ndihmë videoja e mëposhtme, e postuar nga Drejtoria e Përgjithshme e Policisë gjatë vizitës së sotme të Haki Çakos në Akademinë e Policisë, tregon të gjithë hapat dhe përgatitjet që i duhen çdo kandidati për tu bërë pjesë e Patrullave të Përgjithshme të Policisë së Shtetit.
Postimi i plotë i Drejtorisë së Policisë:
Mësim tregues përmbledhës i gjithë programit teorik dhe praktik të Kolegjit të Policisë në Akademinë e Sigurisë, për përgatitjen e oficerëve të Patrullës së Përgjithshme.
Përgatitja dhe zhvillimi i aftësive që të jemi konkurues me policitë e vendeve të BE-së, nën moton: “Polic nuk të bën vëtëm uniforma, por aftësitë dhe sjellja.”
Gjatë mësimit tregues u demonstruan teknikat e vetëmbrojtjes policore dhe teknikat e çdo veprimi policie.
Ajo çfarë është e rëndësisishme, është jetësimi i politikave të Policisë së Shtetit në lidhje me përdorimin e forcës, politikë që mbështetet në parimet e: Ligjshmërisë, Domosdoshmërisë, Proporcionalitetit dhe Humanizmit.
I pranishëm në këtë mësim tregues ishin Drejtori i Policisë së Shtetit, Drejtues Madhor Haki Çako, Drejtori i Përgjithshëm për Sigurinë Publike, Drejtues i Lartë Altin Qato, Drejtori i FLO-së, Drejtues i Parë Niko Brahimaj, stafi akademik dhe instruktorët.
Në përfundim të mësimit tregues, Drejtori i Policisë së Shtetit z.Çako ka falenderuar studentët e Kolegjit të Policisë për përgatitjen e tyre dhe performimin duke e cilësuar demonstrimin si një spektakël të jashtëzakonshëm.
Z.Çako ka vlerësuar edhe punën e Drejtorit të Akademisë së Sigurisë, të drejtuesve të Kolegjit të Policisë, të instruktorëve, si dhe studentët për vullnetin dhe mundin e tyre për të arritur këtë performancë.
“Jam krenar për kolegjin e Policisë dhe për gjeneratën e re të policisë që përditë po i ndryshon imazhin Policisë së Shtetit. Ju uroj gëzuar Vitin e Ri, suksese në punë që do filloni shumë shpejt dhe mbarësi në familjet tuaja.”
Këshilltarja e ICITAP për Akademinë e Sigurisë, Martha Bacile Findlay, ka vlerësuar atë çka ndodhi gjatë këtij mësimi tregues.
“Megjithëse e kam mbaruar Akademinë e Policisë si e para në klasë në vitin 1975 me pikët maksimale në aftësi fizike, dhe megjithëse kam patur rripin blu në Tae Kwon Do, nuk do kisha mundur kurrë t’i përdorja teknikat që kursantët demonstruan sot! Jam e sigurt se të gjithë ju jeni krenarë, me të drejtë.
E di që kursantët dhe instruktorët kanë punuar shumë për të arritur këto rezultate sot. Sado që të kenë punuar, ata ia arritën të kenë sukses sepse patën mbështetjen e udhëheqësve të tyre. Shpresoj që do t’i përcillni vlerësimet tona edhe pranë instruktorëve që nuk i njohim të cilët gjithashtu ndihmuan në përgatitjet për ditën e sotme
Ju urojmë të gjitha familjeve tuaja çdo bekim që 2017-a mund të ofrojë”.
Drejtori i Akademisë së Sigurisë Bilbil Memaj, ka falënderuar Drejtorin e Policisë së Shtetit, Drejtorin e Përgjithshëm për Sigurinë Publike, si dhe përfaqësuesen e ICITAP, për mbështetjen e dhënë dhe ka theksuar se ky mësim është vetëm fillimi i zbatimit të një filozofie dhe metodologjie të re të Akademisë së Sigurisë, e cila ka për detyrë të përgatisë punonjës policie jo vetëm në teori, por edhe në përgatitjen fizike, me qëllim që oficerët e Patrullave të Përgjithshme, kur të fillojnë punë, të jenë të aftë që të gjitha njohuritë që kanë fituar në teori, t’i bëjnë realitet edhe në praktikë. (A.R/SHUPLAKA)
Discussion about this post