Një incident ka ndodhur pasditen e kësaj të hëne në Portin detar të Durrësit, kur një jaht u zhduk përkohësisht nga vendi ku ishte ankoruar.
Pronari i mjetit lundrues, Dorian Alikaj, ka paraqitur një kallëzim në Komisariatin e Policisë Durrës, duke raportuar se jahti i tij, me emrin “Tamomar 2”, nuk ndodhej më në vendin ku kishte qëndruar për disa muaj më radhë.
Sipas kallëzimit, Alikaj është njoftuar rreth orës 14:00 se mjeti i tij mungonte. Ai ka vënë menjëherë në dijeni Policinë Kufitare dhe më pas ka shkuar në komisariatin e Durrësit për të bërë denoncimin, bën me dije korrespondentja e Top Channel, Vali Qyrfyçi.
Menjëherë pas njoftimit, strukturat janë vënë në lëvizje. Pas denoncimit, jahti është vënë re teksa rikthehej në vendin e mëparshëm të ankorimit, ish-kalatën e peshkimit, ndërsa personat që ndodheshin në bord janë shoqëruar në komisariat për të sqaruar rrethanat.
Ende nuk dihet se si kanë arritur të ndezin mjetin lundrues, pasi çelësat e tij ndodheshin në ruajtje nga kapiteni i jahtit, Memet Ayhan Ulus. Burime nga policia bëjnë me dije se tre persona janë duke u marrë në pyetje për zbardhjen e plotë të kësaj ngjarjeje.
