Pas arratisjes së djeshme të Edison Pulës, vijojnë kërkimet për kapjen e tij. Mësohet se policia ka ngritur postblloqe në tre pika të qytetit të Krujës dhe 12 grupe të Forcave të Ndërhyrjes së Shpejtë kanë rrethuar Krujën pas dyshimeve se 21-vjeçari është fshehur në zonat përreth.
Mësohet se janë rrethuar Kruja, Fushë-Kruja dhe akset që lidhen me Niklën. Ndërkaq, po vijojnë kontrollet në banesa për kapjen e anëtarit të grupit të Niklës, i cili arrestua ditën e djeshme gjatë një aksioni policor ku u vunë në pranga dhe tetë të tjerë.
Ai arriti të arratiset gjatë kohës që po transferohej nga stacioni policor i Fushë-Krujës drejt Komisariatit të Krujës. Edison Pula dhe tetë të tjerë akuzohen për atentatin me tritol ndaj Gentian Bejtjas në shtator të këtij viti, ku 35-vjeçari mbeti i plagosur në këmbë.
Edison Pula akuzohet për “Vrasje me paramendim e ngelur në tentativë”, “Shkatërrim i pronës me eksploziv”, “Vjedhje me dhunë” dhe “Prodhimi dhe mbajtja e armëve dhe municioneve luftarake”. (XH.A/SHUPLAKA)
Discussion about this post