Ministrja e Zhvillimit Ekonomik Milva Ekonomi mblodhi sot Komitetin Këshillimor të turizmit ku u përcaktuan sfidat që duhen plotësuar para nisjes së sezonit turistik.
Gjatë mbledhjes u vendos që nga 20 janari, strukturat akomoduese duhet të aplikojnë dhe vetdeklarojnë kushtet dhe kapacitetet përmes një platforme online.
Në fund të procesit do të lëshohet një çertifikatë e klasifikimit për çdo strukturë sipas kategorive përkatëse dhe standardeve të plotësuara. Po ashtu do të bëhet çertifikimi i rreth 70 udhërrëfyesve të parë deri në fund të muajit shkurt, në mënyrë që të nisin punën e tyre në sezonin e ri turistik.
Këtë vit, do të jetë komisioni i posaçëm i ngritur nga Ministria e Zhvillimit Ekonomik, Turizmit, Tregëtisë dhe Sipërmarrjes e cila do të verifikojë dhe kalojë në skanim të gjitha hotelet dhe guest house në vend nëse i plotësojnë kushtet për të vijuar punën.
Kështu, në sezonin turistik të këtij viti do të lejohen të punojnë vetëm ato hotele, resorte dhe guest house që do të licensohen pas kalimit në komisionin e posaçëm të verifikimit.
Sipas ministres, kjo është përpjekja e parë rregulluese në 25 vjet në këtë sektor. (D.D/Shuplaka)
Discussion about this post