Pasi forcat rebele dhe ato qeveritare rregulluan çështjen e armëpushimit për të lejuar largimin e banorëve para dorëzimit final të qytetit, karvanët e autobusëve dhe makinave me rebelë e civilë rinisën udhëtimin e tyre për t’u larguar nga qyteti i rrethuar i Alepos mes borës dhe temperaturave nën zero.
Deri më tani e pak njerëz kanë mbetur në këtë zonë të Aleppos, pasi më shumë se 25 000 të tjerë janë larguar drejt sigurisë relative të zonave që kontrollohen nga rebelët në provincën e Alepos dhe Idlibit.
Pas shkeljes së fundit të marrëveshjes së evakuimit, ata pritën thuaje 24 orë në temperatura të ulëta pa ushqim apo ngrohje, derisa palët ranë sërish dakord për rinisjen e evakuimit, shkruan Top Channel.
Grupet e ndihmës humanitare raportojnë se edhe ata që janë larguar përballen me një situatë të vështirë, pasi Idlibi ku kanë shkuar është ende zonë lufte, pavarësisht se po pëson shumë më pak bombardime në krahasim me Alepon.
Mësohet se më shumë se 60 autobusë dhe qindra mjete private janë gati të nisen nga Alepo dhe pas largimit të tyre, pritet që qeveria e Bashar al Asad të lajmërojë kontrollin e plotë të qytetit. (J.V/Shuplaka)
Discussion about this post