Festivali i Filmit Nashville në SHBA, çmimi “Aktorja më e mirë” shkon për një shqiptare

Katër ditë më parë u mbajt Festivali i Filmit “Nashville 2017″ në SHBA, ku kanë marrë pjesë aktorë e regjisorë të njohur nga e gjithë bota.

Mes emrave të fituesve ishte edhe një aktore shqiptare. Bëhet fjalë për Suela Bakon, e për interpretimin e rolit të saj në filmin horror “Bloodlands”, e cila është vlerësuar si aktorja më e mirë në kategorinë e “Graveyard”.

“Bloodlands” është një film horror i xhiruar në Shqipëri në vitin 2014, i cili tregon historinë e një gruaje të thjeshtë shtatzënë, e cila dhunohet nga banorët e lagjes së saj.

Atë e dëbojnë në mal duke e quajtur shtrigë. E dëbuar dhe e lënduar, kjo grua vendos që të shndërrohet në një shtrigë të vërtetë dhe të marrë hak për vuajtjet që i kanë shkaktuar. Aktorja Suela Bako luan rolin e nënës në një familje ku zhvillohen ngjarjet kryesore të filmit, ku kësaj familjeje i duhet të përballet me mallkimet e shtrigës.

Ndërkohë çmimin e madh të jurisë e ka fituar “Some Freaks”, ndërsa Lily Mae Harrington ka marrë çmimin si aktorja më e mirë. Ndërsa aktori më i mirë mashkull u shpall Pytor Skvortsov për rolin e tij në filmin “The Student”. (D.D/Shuplaka)