Kanë kaluar 6 ditë nga vrasja e Santiago Malkos, por policia nuk ka ende asnjë autor të arrestuar për ngjarjen. Një dëshmitar, duke folur për “Klan Plus”, ka treguar dinamikën e ekzekutimit të ish-efektivit të policisë, duke treguar se dy autorët kanë qëlluar me dy armë të ndryshme ndaj 26-vjeçarit.
“Viktima, që më vonë mësova se quhej Santiago Malko doli nga lavazhi me makinën e tij qetësisht. Në ato moment, një mjet tip Benz i preu rrugën. Pastaj një furgon i bardhë doli para Benzit dhe makinës së Malkos. Nga ky furgon zbritën dy persona. Njëri mbante armë në dorë, që nga zhurma e plumbave u kuptua që ishte kallashnikov. Kanë zbrazur dy karikatorë, të gjitha mbi makinën. Më pas, njëri nga autorët iu afrua makinës së Malkos, duke gjuajtur edhe një herë nga afër; këtë herë nuk e di me çfarë arme. Kjo mesa duket për tu siguruar për vrasjen”, ka thënë dëshmitari, që ka parë nga afër skenën.
Po ashtu, ai zbulon se autorët u larguan të qetë nga vendi i krimit dhe se nuk e kishin të mbuluar fytyrën. “Autorët ishin pa maska, madje ai që qëlloi, për mua ishte njeriu më i qetë që kam parë ndonjëherë. Pasi qëlluan mbi makinën e Santiago Malkos, të dy autorët u futën në makinë. Benzi, i cili luajti vetëm rolin e bllokimit të rrugës, u largua në drejtim të Oxhakut, ndërsa furgoni i bardhë iku në drejtim të Freskut. Krejt qetësisht, pa përdorur ndonjë shpejtësi të madhe”.
Pak orë pas ngjarjes, makina e autorëve u gjet e djegur në fshatin Ferras në periferi të Tiranës ndërsa për fugronin e autorëve të krimit nuk ka asnjë shenjë.
Discussion about this post