Gjashtë lëvizjet, RAMA-META-BASHA, çfarë dimë deri tani dhe e kujt është lëvizja e radhës

Për të gjithë ata që nuk e ndjekin shumë politikën, por gjithsesi janë të interesuar të dinë çfarë ka ndodhur deri më tani, nga e diela deri më sot, ”Shuplaka” sjell të përmbledhur gjashtë lëvizjet politike të Ramës, Metës dhe Bashës. 

1.RAMA fton të dielën për darkë METËN te pazari i ri. Me vete merr ERION VELIAJN. META shkon me PETRIT VASILIN. Disa medie dalin me titujt ”Arrihet koalioni PS-LSI”. Nga LSI-ja heshtje totale, madje lajmërohet mbledhje e Kryesisë, duke vënë në dyshim të qartë se një koalicion ishte arritur.

2.META pas mbledhjes së kryesisë së LSI-së, të hënën,  del në deklaratë të fortë. Jo vetëm që nuk konfirmon atë që ishte ”shitur nga mediet”-Koalicionin PS-LSI, por thotë qartësisht se nuk mund të hyjë në zgjedhje pa opozitën. Madje Meta ofron edhe mandatet e ministrave dhe të tij, për zgjidhjen e situatës.

3.BASHA përshëndet vendimin e METËS (LSI-së), duke dyshuar nëse do të marrë një vendim të tillë. ”Mirësevjen te Shqipëria dhe shqiptarët”, qe reagimi i parë i Bashës, të martën në mëngjes, ndërsa Rama nuk kishte folur ende.

4.RAMA, pret drekën për të bërë një postim në ”Facebook”, ku ” e vlerëson përpjekjen e bashkëkryetarit të koalicionit qeverisës, Ilir Meta, për të kërkuar një zgjidhje që kënaq Partinë Demokratike”. Ofrohet për dialog, por me kushtin e zbatimit të Kushtetuës.

5.RAMA shkon në zyrën e METËS në Kuvend, ku flet ballë përballë për plot një orë e gjysmë. Asgjë nuk dihet çfarë bisedojnë. Rama del nga Kuvendi dhe i hipën makinës pa thënë asgjë për mediet.

6.BASHA, sot është i gatshëm për dialog, siç e ka kërkuar që ditën e parë të protestës, por me kushtin e zgjedhjeve të lira dhe të ndershme.

”Ndaj nëse do të ketë dialog politik, siç e kemi kërkuar që prej ditës së parë, ky dialog politik nuk do të kthehet kurrë në një dialog të pistë mes politikanëve të opozitës dhe pozitës që të vazhdojë komploti por do jetë dialogu politik që përmes standardit politik europian përmes zgjedhjeve të lira dhe të ndershme, do t’i japë fund Republikës së vjetër, rrugëve të vjetra dhe mënyrave të vjetrave, që çdo gjë që në këtë vend mban peng shpresat dhe zhvillimin.”, deklaroi Basha këtë mesditë para zyrës së Ramës.

Askush nuk e di se cila do jetë lëvizja e radhës: përveç Ramës, Metës dhe Bashës. Tani na mbetet të presim nëse do të ketë qeveri teknike, qeveri besimi, si do zgjidhet presidenti dhe kur do të mbahen zgjedhjet. (V.G/ SHUPLAKA)