Pas lirimit me kusht që vendosi gjykata franceze, Ramush Haradinaj, në një intervistë telefonike për Zërin e Amerikës, ka rrëfyer atë çfarë ka ndodhur me ndalimin e tij në Francë.
Sipas kreut të AAK-së, ndalimi i tij është thjesht politik dhe aspak ligjor.
Haradinaj u shpreh se do të qëndrojë në Francë deri në përfundim të të gjithë procesit.
“Do qëndroj në Francë deri në mbylljen e procesit. Arrestimi im jo ligjor, është krejtësisht politik. Nuk ka pse të ndodhë ekstradimi im në Serbi. Burimi i këtij rasti është krejtësisht politik. Franca po abuzon me situatën time. Serbia nuk ka juridiksion mbi shtetasit e Kosovës. Mobilizimi i shqiptarëve më bëri të ndihem krenar”, tha Haradinaj.
Ramush Haradinaj u ndalua më 4 janar në Francë në bazë të një urdhër-arresti të lëshuar nga Serbia në vitin 2004.
Gjykata në Colmar të Francës, pas shqyrtimit të dokumentacionit ka vendosur që Haradinaj të lihet i lirë me kusht që të mos dalë nga Franca dhe të lajmërohet tek autoritetet dy herë në javë. (A.R/SHUPLAKA)
