Në kohën që pritej që të merrej një vendim mbi të ardhmen e tij, 26-vjeçari Mauro Icardi, ka paditur klubin e Interit.
Sulmuesi kërkon dëmshpërblim 1.5 mln euro për dëmtim imazhi dhe riintegrim të plotë në skuadër, pas vendimit të Contes i cili e tha qartë se ish-kapiteni nuk është pjesë e planeve të tij. Icardi, siç raportohet nga “Il Corriere della Sera”, beson se ka pësuar dëme nga “sjellja shtypëse” e Interit, është “lënduar në dinjitet”.
Në padinë e dorëzuar në gjykatë, argjentinasi citon 41 fakte (prova), ku e bazon pretendimin e vet, përfshirë dokumente, video dhe artikuj mediash. Icardi ka kërkuar nga gjykata si dëshmitarë të gjithë shokët e skuadrës. Ata duhet të dëshmojnë për situatën.
Ndër arsyet e padisë ndaj Interit, përveç mungesës së pjesëmarrjes në fushatat e ndryshme publicitare, Icardi përmend edhe përjashtimin nga bisedat në ekip, ku komunikohen oraret dhe metodat e trajnimit. Por jo vetëm. Icardi reklamon në gjykatë edhe mënyrën e heqjes së numrit 9, si dhe detyrimin për t’u stërvitur me “tepricat: e skuadrës zikaltër. E gjitha kjo pa precedent, të cilëve iu referohet Icardi.
Ai përmend rastet e Puggioni te Chievo dhe Albertazzi te Verona, në të cilat të dy lojtarët më pas çuan çështjen kundër klubeve të tyre përkatëse. Në këtë pikë, me pak fjalë, lufta me Interin është tashmë totale, por klubi zikaltër beson se ka të drejtë, duke pasur parasysh që Icardi është stërvitur gjithmonë me grupin, përveç kohës taktike, e cila është diskrecion i trajnerit.
Në çdo rast, fjala e fundit do të thuhet nga gjykatësit. Një paralajmërim për këtë veprim ekstrem, Icardi ia kishte dërguar Interit më parë, që më 11 gusht. Tashmë pritet të caktohet gjyqtari, që do të sqyrtojë padinë e argjentinasit. Sidoqoftë, vendimi nuk mund të merret para tre muajsh. Tre muaj që ish-kapiteni rrezikon seriozisht t’i kalojë në “Pinetina”, i ndarë nga “shtëpia zikaltër”. /telesport/
