Është folur gjatë në medie gjatë këtyre ditëve për ceremoninë e inaugurimit të presidentit të ri të SHBA-ve, Donald Trump, më 20 janar dhe emrat e personaliteteve shqiptare që janë ftuar e do të marrin pjesë në këtë ceremoni.
Katër ditë përpara zhvillimit të saj, mbrëmjen e djeshme, u bë e ditur se kryetari i Kuvendit të Shqipërisë, e njëherazi kreu i LSI-së, Ilir Meta, do të niset ditën e sotme drejt SHBA-ve për të marrë pjesë në inaugurimin e presidentit të 45-të të Amerikës.
Burime pranë Metës konfirmuan ftesën e ardhur në adresë të kryetarit të LSI-së. Pas tij, ishte edhe kryetari i Partisë Demokratike, Lulzim Basha, që konfirmoi pjesëmarrjen në ceremoninë e 20 janarit. Ai bëri me dije se ditën e sotme do të niset drejt Shteteve të Bashkuara të Amerikës me ftesë të republikanëve.
Flitet se të pranishëm në ceremoninë e inaugurimit të presidentit të ri të SHBA-ve do të jenë edhe dy ministrat e kabinetit qeverisës, ministri i Punëve të Jashtme, Ditmir Bushati dhe ministri i Mirëqënies Sociale, Blendi Klosi. Përpos pjesëmarrjes në ceremoninë e inaugurimit, ata do të jenë pjesëmarrës edhe në eventet pasuese që do të zhvillohen ditën e marrjes së detyrës nga Trump.
Mësohet se në ceremoninë e inaugurimit të presidentit të ri amerikan Donald Trump, do të marrë pjesë edhe Këshilltari i Presidentit për Mbrojtjen, Gjeneral Piro Ahmetaj. Në nëntor të 2015-ës, Kreu i Lartë i Shtetit, e pezulloi atë nga detyra për ta rikthyer sërish pas fitimit të gjyqit. (XH.A/SHUPLAKA)
Discussion about this post