Kryeministri Edi Rama ka vijuar kritikat ndaj Bullgarisë duke paralajmëruar sërish ndarjen nga Maqedonia e Veriut në rrugën e integrimit në Bashkimin Europian.
Edi Rama: Nëse kjo çmenduria e Bullgarisë do të vazhdojë ne duhet t’i ndajmë rrugët tona në këtë proces. Ne do të jemi së bashku në Ballkanin e Hapur ne jemi fqinj dhe ne po përpiqemi të krijojmë lidhje të ngushta me Maqedoninë e Veriut dhe me të gjithë fqinjët e tjerë, sepse Ballkani Perëndimor është hallka më e dobët e Evropës dhe është i dobët karshi agresionit rus dhe konfliktit. Ne nuk duam asnjë lloj kërcënimi të atillë që do të rrezikonte paqen që po ndërtojmë. Ajo që më duket e neveritshme në qëndrimin e Bullgarisë është mënyra si po e bëjnë këtë”
Kryeministri Edi Rama ka komentuar përplasjet brenda Partisë Demokratike. Në një intervistë për mediat franceze, ai është shprehur se protestat e dhunshme në vendin tonë nuk janë bërë për qeverinë, por nga Opozita për Opozitën, referuar skenarit të 8 janarit që u krijua në selinë e Partisë Demokratike.
“U bë një kohë e gjatë që nuk ka pasur më protesta të dhunshme. Ka pasur një protestë të dhunshme, por ka qenë mes tyre, protestë për veten dhe jo ndaj qeverisë,”- tha Rama.
Më 8 janar, demokratët, mbështetës të kryedemokratit Sali Berisha mësynë në selinë blu për të protestuar kundër ish-kryetarit të PD-së, Lulzim Basha. Gjithçka erdhi pas përplasjeve brenda selisë blu, të nisura në shtator të vitit të kaluar kur Basha vendosi të përjashtonte Berishën nga grupi parlamentar i PD-së, pasi ishte shpallur non-grata nga DASH. 8 janari u mbyll me dëme të mëdha materiale e të plagosur.
