Ish-ambasadori i Shqipërisë në Turqi, Genc Muçaj, ka reaguar lidhur me vrasjen e një dite më parë të ambasadorit rus në Turqi, Andrey Karlov. Ai e ka cilësuar si një lajm të dhimbshëm vrasjen e Karlov, për të cilin ai tha për “Report Tv” se e kishte mik. Ish-ambasadori Muçaj tregoi gjithashtu se vetëm tri ditë më parë kishte komunikuar me të.
I pyetur lidhur me motivin e kësaj ngjarje të rëndë që ka shkaktuar tanimë tensione, ai shprehet se ngjarja është një rast i izoluar që nuk duhet të konsiderohet si komplot. Sipas Muçaj, nuk ka asnjë lidhje paralele mes vrasjes së Andrey Karlov me Dukën Ferdinand në 1914-ën, që çoi edhe në nisjen e Luftës së Parë Botërore.
“Incidente të tilla mund të jenë të izoluara që nuk mundet dot të jenë shkak, kam dëgjuar komente fatale deri në paralelizma fatale. E para jetojmë në kohëra të tjera, nuk mund të ekzistojnë një gjë e tillë. Turqia dhe Rusia janë shtete më një histori të madhe të konsoliduar. Opinioni publik i të dy vendeve ka një shqetësim, se kemi të bëjmë me dy superfuqi ushtarake. Ata që kryen këtë akt, ka qenë një reagim i tij personal. Në Turqi ka njerëz të radikalizuar dhe për fat të keq miku jonë i shtrenjtë u bë objekt i këtij eskalimi. Së fundmi, dy ministrat e jashtëm vendosëm që të krijojnë një hetim të përbashkët për rastin në fjalë. Ky incident do të shërbejë më shumë për të bashkuar forcat në luftën ndaj terrorizmit, i cili nuk është një çështje lokale, por globale. Lufta kundër terrorizmit kërkon një front të bashkuar, pasi nuk ka as fe e as komb, por duhet reaguar si ndaj terrorizmit”, është shprehur Muçaj.
Më tej, ish-ambasadori i Shqipërisë në Turqi ka mohuar mundësinë që miku i tij kishte ndonjë shqetësim apo frikë lidhur me ngjarjen. Ai theksoi se e vetmja gjë që e shqetësonte Karlov ishin marrëdhëniet mes Turqisë dhe Rusisë.
Discussion about this post