Pas situatë së pandemisë e cila ka kushtëzuar shumë sektorët nga ana finaciare, nuk ka shpëtuar edhe futbolli në të cilën gjenerohen vlera marramendëse nga protagonistë, të drejtat televizive, sponsorizimet, biletat apo pagat e lojtarëve. Një situtatë të vështirë është duke kaluar edhe kubi i njohur spanjoll, Barcelona. Këshilli Administrativ i Barcelonës komunikoi se tavolina e negociatave për të vendosur modalitetet e reduktimit të pagave të lojtarëve profesionistë dhe të të gjithë punonjësve të klubit, ka përfunduar pa u arritur ndonjë akord.
Pas kësaj është forcuar hipoteza se lojtarët e Barcelonës nuk pranojnë uljen e pagave, edhe pse klubi prej kohësh është në vështirësi të mëdha ekonomike, ndërsa Presidenti i larguar Bartomeu e cilësoi këtë çështje si thelbësore për vazhdimësinë e klubi “blaugrana”.
Tani për të dyja palët, klubin dhe lojtarët nis një periudhë reflektimi që do të zgjasë deri në 23 nëntor. Pas kësaj data, nëse lojtarët nuk do të pranojnë propozimin e klubit, Barcelona mund të vendosë në mënyrë të njëanshme uljen e pagave, shkruan Supersport.
Në rast të një veprimi të tillë, lojtarët nga ana e tyre mund të nisin një çështje ligjore për të zgjidhur kontratat duke u liruar nga detyrimet që kanë ndaj Barcelonës. Një situatë vërtet e rrezikshme, ndërkohë që në komunikatën zyrtare të dhënë nga drejtuesit e Barcelonës shkruhet:
“Në këtë situatë i takon Këshillit të Administrimit të marrë vendimet për të zgjidhur problemin e rëndë financiar të lidhur me pandeminë e Covid-19 që provokon një reduktim të të ardhurave prej mbi 300 milionë eurosh, për sezonin 2020-2021 dhe që na detyron të rishohim shpenzimet për pagat për një shifër prej 191 milionë eurosh”.
