Ish-kreu i SHISH-it, Fatos Klosi dhe një nga zërat e së majtës në Shqipër, është shprehur se Basha e ka kuptuar se3 marrëveshja e 18 majit me Ramën i prishi punë, madje edhe kundërshtarët brenda partisë po kapen tek kjo pikë.
Por sipas Klosit ajo marrëveshje tani nuk i duhet as Bashës as Ramës, pasi u bë thjeshtë për të futur PD-në në zgjedhje.
Në një intervistë për gazetën “Panorama”, Klosi shprehet se nuk përjashton një bashkëpunim mes PS-së dhe LSI-së në një të ardhme jo të largët. Fakti që PS-ja është në qeveri dhe LSI-ja në opozitë, për Fatos Klosin duhet parë dhe si një mundësi gare dhe konkurrence se cila nga dy partitë e majta do të përfaqësojë më mirë elektoratin që i voton me programe dhe politika sociale të majta.
“Nuk besoj se do të ketë një bashkëqeverisje. Edhe Basha po shoh që e ka kuptuar se ajo marrëveshje i prishi punë dhe pas saj po kapen edhe kundërshtarët e tij në parti. Ndërkohë që edhe Ramës nuk i intereson. Kompromisi i 18 majit ishte i nevojshëm për vendin, sepse futi PD-në në zgjedhje. Ndoshta tani do të ishim duke bërë sherre për zgjedhjet. Nuk shoh të ketë interes nga asnjë palë që të ketë një bashkëpunim. Edhe Rama, nëse ka bërë ndonjë premtim, nuk e ka më të nevojshme. Më shumë besoj se mund të ketë një bashkëpunim PS-LSI, edhe pse Monika në krye të LSI-së është zgjedhur për të bërë opozitë të fortë, por gjërat ndryshojnë dhe gjithnjë duhen kuptuar momentet politike, sepse përndryshe del jashtë politikës”, është shprehur Klosi. (B.H/Shuplaka)
