Udhëheqësit e doganave nga Ballkani Perëndimor dhe BE u takuan sot në Tiranë për Konferencën e nivelit të lartë me temë “Partneriteti Doganor për një Evropë të Lidhur”.
Eventi shërbeu si një platformë për të përforcuar bashkëpunimin strategjik doganor, për të mbështetur qëllimet e Planit të Rritjes së BE-së dhe për të çuar përpara përafrimin e rajonit me standardet evropiane.
Në fund, pjesëmarrësit miratuan një deklaratë të Përbashkët me angazhimin për të përshpejtuar harmonizimin me Kodin Doganor të BE dhe për të zgjeruar Korsitë e Gjelbra e Blu.
I pranishëm në këtë event ishin nga pala shqiptare ministri i Financave, Petrit Malaj, zv/kryeministrja Belinda Balluku dhe Genti Gazheli, drejtori i Përgjithshëm i Doganave. Ndërsa nuk mungoi as Roberto Alesse, drejtori i Doganave të Italisë.
Eventi u organizua nga Administrata Doganore e Shqipërisë, Agjencia Italiane e Doganave dhe Monopoleve, Sekretariati CEFTA/projekti SEED+ dhe Sekretariati i Komunitetit të Transportit.
Në fjalën e tij, ministri Malaj theksoi rëndësinë e përmirësimit të efikasitetit doganor në kuadër të procesit të integrimit në Bashkimin Europian, që është një ambicie e përbashkët e vendeve të rajonit të Ballkanit Perëndimor.
Ministri tha se qeveria shqiptare po ndërmerr një nga reformat më gjithëpërfshirëse në historinë e administratës doganore, teksa në kuadër të procesit të anëtarsimit në BE sapo janë hapur edhe negociatat për Kapitulli 29 “Dogana”.
“Ne jemi të përkushtuar për të përafruar procedurat tona me standardet e BE-së, duke u siguruar që të jemi plotësisht të përgatitur për t’u bërë pjesë e Unionit Doganor”, tha ndër të tjera ministri.
Në këtë proces, ndër prioritet e qeverisë shqiptare, Ministri i Financave renditi: forcimin dhe përafrimin me standardet dhe proceset doganore të BE-së; rritjen e bashkëpunimit rajonal mes administratave doganore të Ballkanit Perëndimor; mbështetjen e lehtësimit të tregtisë dhe integrimit ekonomik më të thelluar; avancimin e Korridoreve të Gjelbër dhe të Kaltër ndërmjet Ballkanit Perëndimor dhe BE-së; investimin në ndërtimin e kapaciteteve dhe asistencë teknike; promovimin e marrjes së statusit AEO (Operator Ekonomik i Autorizuar).
Pikë tjetër e deklaratës ishte angazhimi për të përmirësuar shkëmbimin e të dhënave në kohë reale përmes SEED+ dhe për të mbështetur hapat drejt njohjes së programeve të Operatorëve Ekonomikë të Autorizuar.
Përfaqësuesit e CEFTA-s thanë se duhet punuar edhe më tej në drejtim të lehtësimit të procedurave doganore.
