Policia e Shtetit ka reaguar mbi konfliktin mes ministres teknike të Arsimit dhe Sportit, Mirela Karabina dhe Sekretarit të Përgjithshëm të MAS, Plarent Ndrecës.
Referuar konfliktit që nisi me Karabinën e cila kallëzoi penalisht Ndrecën për shkelje të renda ligjore, duke i kërkuar Departamentit të Administratës Publike që ta shkarkonte, pretendim ky që u hodh poshtë, policia shprehet se është njohur jozyrtarisht me konfliktin institucional.
Megjithatë, ajo thekson se nuk është detyrë Policisë së Shtetit që të zgjidhë këtë situatë, ndaj i është drejtuar Gjykatës Administrative dhe Prokurorisë.
Deklarata e Policisë së Shtetit:
Në lidhje me konfliktin në Ministrinë e Arsimit dhe Sportit midis drejtuesve të këtij institucioni, ju bëjmë me dije se:
Drejtoria Vendore e Policisë Tiranë është njohur jo zyrtarisht me konfliktin institucional ndërmjet Ministrit dhe Sekretarit të Përgjithshëm të MAS, por theksojmë se nuk është detyrë e Policisë së Shtetit dhe kompetencë e saj , zgjidhja e kësaj situate.
Policia e Shtetit ju ka bërë me dije zgjidhjen e situatës duke ju drejtuar Gjykatës Administrative dhe Prokurorisë. Për sa i përket shërbimit të sigurisë fizike, të dy shoqeritë janë kontraktuar nga i njëjti institucion.
(XH.A/SHUPLAKA)
