Kryeministri Edi Rama ka bërë të ditur nisjen e një reforme të re ligjore për kontrollin dhe zhvillimin e territorit, si pjesë e një pakete të gjerë reformash që synojnë transformimin e shërbimeve publike dhe përgatitjen e vendit për mandatin e katërt të qeverisjes dhe integrimin e Shqipërisë në Bashkimin Europian, deri në vitin 2030.
Në fjalën e tij, Kryeministri theksoi se toleranca ndaj tokave të zëna në mënyrë të paligjshme në kurriz të komunitetit, apo ndaj lejeve të ndërtimit të dhëna në kundërshtim me ligjin, nuk do të pranohet më. Ai shtoi se, për fat të keq, inspektoratet e mbrojtjes së territorit dhe policitë bashkiake janë bërë shpesh pjesë e problemit, duke mos ndërhyrë dhe madje duke bashkëpunuar në disa raste me shkelësit e ligjit.
“Kjo situatë do të marrë fund, përmes një reforme rrënjësore, e cila do të sjellë kontroll të rreptë dhe zhvillim të qëndrueshëm të territorit,” deklaroi Rama.
Kjo nismë do të ecë paralelisht me reforma të tjera thelbësore, që përfshijnë:
-
Modernizimin e shërbimit të ujësjellësit,
-
Ristrukturimin e sistemit të pastrimit dhe përpunimit të mbetjeve,
-
Sigurimin e furnizimit të qëndrueshëm me naftë dhe barna,
-
Rritjen e cilësisë së shërbimit spitalor.
Këto reforma, sipas Kryeministrit, përbëjnë piketa të qarta në rrugën drejt “Shqipërisë 2030 në Bashkimin Europian”, dhe synojnë të ndërtojnë një vend me standarde europiane në të gjitha fushat e jetës publike.
