Kryetari i Bashkisë së Durrësit ka reaguar lidhur me akuzat për rekomandimin pozitiv dhe punësimin e Berishës në bashki. Deklarata e tij për “Shqiptarja.com” vjen një ditë pas reagimit të bashkisë. Kryebashkiaku Dako e cilëson rekomandimin familjar një procedurë normale që nuk lë vend për skandal, pavarësisht keqinterpretimit që i është bërë në gjykatën e Apelit.
Dako i indinjuar, thekson se ky rekomandim i ligjshëm nuk bëhet vetëm për Lulzim Berishën, por dhe të dënuar të tjerë: “Në bashkinë e Durrësit dhe më konkretisht në zyrën juridike vijnë dhjetëra kërkesa nga qytetarët e Durrësit, ku kërkojnë një karakteristikë familjare.
Kjo është një procedurë e ligjshme. Këto karakteristika, i kërkojnë ata që janë në hasmëri, ata që kërkojnë azil, ata që kanë procese gjyqësore etj, pasi kërkohet për efekt dokumentacioni. Është drejtoria Juridike në bashki që merret me këtë pjesë e cila përpilon dhe dokumentacionin.”
I pyetur përse ka dhënë një rekomandim pozitiv, kreu i Bashkisë së Durrësit thotë se jep gjithmonë rekomandime pozitive për të gjithë të interesuarit që kanë aplikuar për tu pajisur me rekomandim familjar.
“Unë nuk kam lëshuar asnjë garanci për punësim. Nuk mund të punësoj këtë person, pasi ma ndalon ligji, për shkak se ka gjëndjen gjyqësore “i dënuar”. Punësimi i tij në bashki bëhet pa pagesë dhe është për punë vullnetare, pasi kompanitë private këto persona të dënuar nuk i pranojnë. Këta të dënuar, nuk kanë as bordero, por bëjnë punë të rëmdonta, pastrojnë plazhin ose lulishtet e punë të tjera, të cilat monitorohen nga Shërbimi i Provës në Durrës.”, shprehet Dako i pyetur për garantimin e punësimit të Berishës në bashki.
Kreu i Bashkisë së Durrësit bën me dije se njohja e tij me Lulzim Berishën është e hershme, kur vetë Dako ishte një qytetar i thjeshtë dhe Lulzim Berisha sportist.
Discussion about this post