Pas pamjeve që tronditën qytetarët e Tiranës, ku katër familje luftuan dje me përmbarimin dhe policinë në mbrojtje të banesës së tyre, Fax News gjendet sot në shtëpinë e Luan Llapajt.
Situata sot duket më e qetë, edhe pse banorët shprehen se frika e rikthimit të përmbarimit është shumë e madhe.
Kryefamiljari Llapaj ka treguar për gazetaren Mirilda Tili, një ‘’mal’’ me dokumente që familja kishte, dhe të gjitha proceset gjyqësore, ku ishin përballur me Aleksandër Gavocin, të cilit gjykata e shkallës së parë i ka kaluar pronën e tyre.
Zanafilla e pronës së tyre nis në vitin 1939, ku gjyshi i Gavocit ka qenë oficer dhe ka përfituar një sipërfaqe toke rreth 10 mijë metra katrorë, që sipas Llapajt ka ndodhur përmes falsifikimit.
Vite më vonë ndërsa familjet Llapaj dhe Dervishaj kishin ndërtuar shtëpitë e tyre, Aleksandër dhe Ilir Gavoci përfituan nga kryetari i Komisionit të Kthimit dhe të Kompesimit të Pronave, këtë sipërfaqe toke, ku përfshihet dhe godina e familjeve.
‘’Ai pronari që ka folur te ju dje ka paguar lekë në gjykata, nuk është në të drejtën e zotit. Gjyshi i Gavocit nga ana e mamasë ka qenë oficer kufiri, kjo tokë nuk u shfrytëzua ndonjëherë, dhe gjyshi i zotërisë i fut në hipotekë. Pronat janë sekuestruar që në 1939, prandaj pushteti komunist nuk merret fare me këtë. Ligji i kthimit të pronave thotë që kthehen pronat që janë sekuestruar pas vitit 1944.
Për këtë ka firmosur vetëm kryetari i agjensisë për kthimin e pronave, te noterja janë shkruar dhe emrat e anëtarëve të tjerë të Komisionit. Si mund ti pranojnë gjyqtarët këto dokumente të falsifikuara? Më e keqja është se ne me vendim gjykate jemi detyruar që të paguajmë miliona lekë, për shkak se sipas tyre kemi shfrytëzuar tokën e Gavocit. Vetë Aleksandër dhe Ilir Gavoçi kanë deklaruar që ne të mos paguanim gjobën e dhënë nga gjykata ndaj dy familjeve tona.
Në marrëveshjen që ne kemi firmosur me zotërinë, na është premtuar nga një shtëpi prej 117 metra katrorë në pallatin që do të ndërtohej, në katin e katërt. Nuk kemi kërkuar dyqan, ashtu siç thotë zotëria. Na ka sjellë njerëz të ndryshëm në mënyrë që të na testonte sesa ne do të hanim presionin. Me më vra sot unë do të them që ai paguan lekë kudo që shkon. Ne do të luftojmë që të mbrojmë pronën tone”, u shpreh Llapaj.
Në cilën moment u shkel kontrata?
Në momentin që zotëria na kërkonte që ne ti jepnim diçka që nuk na takonte që ishte pronë e Bashkisë. Ai aty u nxeh, dhe nuk i qëndron më marrëveshjes që ne kemi bërë. Pretendimi ynë është që ose të marrim shtëpi këtu, ose ekuivalenten e kësaj prone diku tjetër, nuk po kërkojmë as dyqane asgje. Ai ne si katër familje mund të na sistemojë në një kat, kaq e shkurtër është kjo histori, dhe aq e madhe është babëzia e tyre.
(E.K/FAXWEB.AL)
