Partia demokratike feston sot 26-vjetorin e themelimit të saj. I pranishëm në aktivitetet e zhvilluara në mjediset e jashtme të selisë së PD-së kryetari Lulzim Basha vlerësoi të gjithë themeluesit e PD-së të cilët i dhanë mundësi vendit të ishin pjesë e vendeve demokratike.
Ai vlerësoi rolin e partisë që drejton për disa nga reformat më rrënjësore që vendi ka njohur.
”Në këtë përvjetor dua të falenderoj të gjithë themeluesit e PD-së falë kountributit të të cilëve vendi arriti të njohë lirinë dhe demokracinë. Unë dua të garantoj se emri i tyre do të kujtohet gjithmonë. Ne jemi partia që sollëm vlerat e lirisë te shqiptarët dhe sot do të jemi modeli i ndryshimit të kësaj politike që është nën kthetrat e krimit”, ka deklaruar Basha.
“Ne mund t’i ofrojmë qytetarëve një model të ri politik, ku levat e fuqishme të kontrollit në demokraci të kenë hapësirën dhe mundësinë të kontrollojnë çdo vendim të qeverisë së ardhshme. Modeli i ri nuk duhet të mbështetet në fasadë dhe propagandë, por në punë dhe interesin publik”,u shpreh Basha në theksimin që ai i bëri demokratizimit dhe hapjes së partive.
Ai akuzoi qeverinë se ka vrarë shpresën te shqiptarët dhe i ka bërë ata që të arratisen nga Shqipëria ashtu si vite më parë kur donin të largoheshin nga regjimi.
”Ndihem thellësisht i lumtur që jam në krye të PD-së, unë jam prova e gjallë se Partia Demokratike është një parti e hapur, një parti e hapur ndaj vlerave dhe talenteve të reja”, ka thënë ai ndër të tjera.
Discussion about this post