Analisti i çështjeve rajonale, Lulzim Veliu, në një intervistë për Fax News ka diskutuar mbi situatën politike të krijuar në Kosovë, ku pas 33 tentativash të dështuara, vendi ende nuk ka arritur të konstituojë Kuvendin e ri.
“Është e paimagjinueshme që të kemi 33 seanca pa rezultat dhe asnjë reflektim politik. Kjo situatë është jo vetëm një krizë institucionale, por edhe një sinjal i rrezikshëm për stabilitetin dhe funksionimin demokratik të shtetit,” u shpreh Veliu.
Sipas tij, moszgjidhja e ngërçit në Kuvend po bllokon proceset kyçe për shtetin.
“Ka shumë çështje që janë në pritje në sistemin gjyqësor dhe të tjera që nuk ecin dot përpara pa konstituimin e Kuvendit. Kjo situatë nuk i shërben qytetarëve të Kosovës dhe as vetë qeverisë, e cila tashmë ka kaluar afatet e saj.”-ka thënë Veliu.
Veliu theksoi se një gjendje e tillë i shkon për shtat vetëm faktorëve të jashtëm që nuk kanë interes për zhvillimin e Kosovës.
“Kjo krizë i shërben vetëm atyre që nuk duan një Kosovë funksionale, të zhvilluar dhe të integruar ndërkombëtarisht.”
I pyetur për deklaratat e fundit të Presidentit serb Aleksandar Vuçiç, Lulzim Veliu shprehu këndvështrimin e tij.
“Deklaratat e Vuçiç janë tërësisht populiste. Ai po përpiqet të zhvendosë vëmendjen nga protestat masive në Serbi duke nxitur retorikë lufte dhe tension,” tha analisti.
Veliu shtoi se retorika e Vuçiç-it lidhet me një fantazi gjeopolitike të rrezikshme.
“Nëse realizohet ëndrra e tij për një konflikt të madh global ku SHBA të dalë e dobësuar, vetëm atëherë Serbia dhe Rusia mund të ëndërrojnë ndonjë ‘fitore’. Por kjo është një logjikë destruktive dhe e izoluar.”
Në përfundim, Veliu tha për FaxNews se as Vuçiç dhe as pasardhësit e tij nuk do ta arrijnë kurrë Kosovën.
Realiteti është i pandryshueshëm: Kosova është një shtet i pavarur dhe do të forcohet përmes institucioneve funksionale, jo përmes bllokadave politike.
