Pas lajmit për shkarkimin e ministrit të Brendshëm Saimir Tahiri, protestuesit në “Çadrën e Lirisë” ia kanë marrë valles. Mesa duket lajmi për largimin e Tahirit, i akuzuar shumë shpesh nga opozita për lidhjet me krimin, është pritur më së miri nga protestuesit.
Në këtë video nga protesta e sotme, shihen disa vajza të veshura me veshje popullore dhe duke kërcyer një valle pogradecare.
Gjatë këtyre ditëve u përfol gjatë nëpër media se “koka” e Tahirit ishte ofruar nga Rama me qëllim që opozita të hiqte dorë nga qeveria teknike, mirëpo në fjalimin e sotëm në “Çadrën e Lirisë”, kreu i partisë kryesore opozitare Lulzim Basha, i hodhi poshtë këto hipoteza.
“Nuk jemi mbledhur këtu as për ‘koka turku’, as për ‘koka delesh’, as për ‘koka kecash’. Jemi mbledhur këtu për standardin e zgjedhjeve të lira dhe të ndershme. Zgjedhje të lira dhe të ndershme me një qeveri dhe kryeministër garant me krimin, nuk mund të ketë. Lajmi se ka shkarkuar Tahirin është një truk për t’i hedhur sy shqiptarëve, opinionit ndërkombëtar”, tha Basha. (D.D/Shuplaka)
