Merkel takim me Vuçiç, flet për Kosovën

“Duhet të luftojmë për stabilitetin dhe Vuçiç gjithmonë ka qenë për atë që zhvillimi në rajon duhet të jetë zhvillim i qetë dhe kjo nuk është e thjeshtë. Këto reforma janë shumë të rëndësishme dhe të guximshme, por duhet të theksoj se raportet me Kosovën janë më të mira”- ka thënë Merkel.

Kurse Vuçiç ka thënë se Serbia është e interesuar për ruajtjen e stabilitetit në rajon, duke thënë se situata aktuale në shumë vende është e turbullt.

“Situata është e turbullt në disa vende të Ballkanit, por paqja mund të ruhet me ndihmën e BE-së dhe të Gjermanisë”, u shpreh Vuçiç.

Ai i ka cilësuar si të vështira bisedimet e Serbisë me Bosnjën dhe Kosovën.

Parlamenti Europian ka miratuar me 4 shkurt Rezolutën për Serbinë, në të cilën thuhet se përparimi i normalizimit të marrëdhënieve midis Beogradit e Prishtinës dhe zbatimi me kohë i marrëveshjeve të arritura është njëri nga kushtet për hyrjen e saj në BE.
Në Rezolutë pasi bëhet thirrje për hapjen e kapitujve 23 e 24 në negociatat për anëtarësim në BE, përshëndetet përparimi i normalizimit të marrëdhënieve midis Beogradit e Prishtinës. Autoritetet po ashtu ftohen që në tërësi dhe me kohë të zbatojnë marrëveshjet e arritura deri më tash, duke ripërsëritur se ky është parakusht për anëtarësim të saj në BE.

Në Rezolutë theksohet po ashtu se negociatat rreth kapitullit 35, që përfshin normalizimin e marrëdhënieve me Prishtinë, janë thelbësore për përparimin e Serbisë drejt BE-së dhe se normalizimi i plotë i marrëdhënieve është kusht i rëndësishëm për hyrjen e Serbisë në BE.

Përshëndetet angazhimi i Serbisë për normalizimin e marrëdhënieve me Kosovën dhe theksohet vullneti i Beogradit që deri në fund t’i zbatojë marrëveshjet për Asociacionin e Komunave Serbe, telekomunikacionin, energjinë dhe Urën në Mitrovicë.
Beogradi e Prishtina po ashtu thirren që të shmangin retorikën negative dhe të bëjnë përparim në zbatimin e plotë të marrëveshjeve të arritura. (M.D/ Shuplaka)