Kryetari i Kuvendit, Ilir Meta tha se raporti i Produktit të Brendshëm bruto në Shqipëri, paraqet vlerat më të ulëta në rajon.
Këtë deklaratë, kreu i Kuvendit i bëri gjatë Forumit Ekonomik. Sipas tij, nuk ka kohë për amatorizëm, prandaj lidhur me çështjen e zhvillimit ekonomik duhet të flasin ekspertët.
“Çështja e zhvillimit ekonomik të vendit është sfida më e madhe. Duhet të kemi një konsensus bipartizan. Para se të flasin politika, duhet të flasin ekspertët. Nuk ka kohë për amatorizëm. Ndaj, kjo strategji zhvillimi do ketë në foks rininë dhe zhvillimin cilësor. Konkurrueshmëria e ekonomisë sonë duhet forcuar akoma më shumë. Raporti i PBB është më i ulëti në rajon. Duhet të nxisim më shumë investimet. Bujqësia duhet të trajtohet dhe nga ana buxhetore si sektor i ekonomisë. Tregu vendas duhet të furnizohet nga prodhimi vendas. Për turizmin po punohet në një plan organik për ta kthyer atë në një promotor të fortë dhe për fronte pune. Rritja më e madhe ekonomike do të bëjë të mundur zhvillim në shëndetësi, arsim. Modeli ynë i zhvillimit do mbështetet tek shtresat e pambrojtura. I bëj thirrje të gjithë atyre që të kontribuojnë, t’i bashkëngjiten këtij forumi.”, tha Meta. (D.D/Shuplaka)
Discussion about this post