“NATO të afrohet më shumë me Rusinë”, Le Pen: Kjo duhet të ndodhë pasi të përfundojë lufta me Ukrainën

Kandidatja për presidente franceze Marine Le Pen ka propozuar marrëdhënie më të ngushta mes NATO-s dhe Rusisë nëse fiton pushtetin.

Në një konferencë për mediat, politikania e ekstremit të djathtë ka bërë thirrje për një “afrim strategjik” me presidentin rus Vladimir Putin, pasi të mbarojë lufta në Ukrainë. Le Pen ka bërë të ditur se do ta tërheqë Francën nga struktura e komandës ushtarake të NATO-s, nëse do të rezultonte fituese.

Por ajo tha se do të vazhdojë të respektojë një pakt kyç të NATO-s sipas të cilit një sulm ndaj një anëtari të aleancës ushtarake shihet si një sulm ndaj të 30 anëtarëve.

Rusia ka kundërshtuar çdo zgjerim të NATO-s drejt kufijve të saj – duke përfshirë përpjekjet e fqinjit të saj Ukrainës për t’u bashkuar me aleancën ushtarake, teksa NATO i ka dërguar armë ushtrisë ukrainase. Le Pen do të përballet me Emmanuel Macron për presidencën në balotazhin e zgjedhjeve të këtij muaji. Disa e kanë akuzuar atë se është shumë afër Rusisë, ndërsa vetë ajo e ka dënuar publikisht pushtimin e Ukrainës, edhe pse më parë kishte takuar presidentin Putin përpara zgjedhjeve të mëparshme franceze në 2017. Ndërsa partia e saj ka marrë fonde nga Rusia.