Monika Kryemadhi, kryetarja e LSI-së e pyetur në lidhje me akuzat e mazhorancës se opozita është e lidhur me qarqe ruse dhe se po zbatojnë një strategji të qartë pro ruse është shprehur se nëse do të ishte kështu do të ishin akoma në Kuvend, duke zbatuar urdhrat e Edi Ramës.
“Të gjitha platformat politike, ekonomike, çdo strategji që që po ndjek Edi Rama janë antishqiptare, çka do të thotë se nëse ne do të ishim duke ndjekur këto interesa do të ishim në parlament si ushtarë të Edi Ramës. Ai kërkon thjesht një largim të vëmendjes nga problemet që ka sot Shqipëria“, tha ajo.
Kryemadhi tha se sot po protestohet kundër këtyre interesave dhe se personalisht ndodhet në shesh për demokracinë, zgjedhje të lira të ndershme dhe fjalën e lirë.
“Sot 99 për qind e njerëzve po protestojnë kundra varfërisë, protestojnë banorët e Astirit, protestojnë minatorët, pensionistët, artistët“, tha Kryemadhi.
Kjo është protesta e 3-të masive që zhvillon opozita e bashkuar pas asaj të 16 Shkurtit dhe të 16 Marsit, pas vendimit për të djegur mandatet e deputetëve dhe për të dalë në rrugë. Edhe në protestat e tjera kombëtare, pjesëmarrja ka qenë e konsiderueshme, ndërsa për herë të parë qytetarët grumbullohen në orët e pasdites.
Opozita kërkon një qeveri tranzitore, që të mund të çojë vendin në zgjedhje të parakohshme, pa Edi Ramën kryeministër. Vendi prej javësh ndodhet në një kolaps instyitucional, pasi ende nuk është bërë e mundur që të plotësohet numri prej 140 deputetësh që parashikon Kushtetuta e vendit.
E megjithatë derimë tani nuk ka asnjë hap pas nga mazhoranca socialiste, ndërsa Rama është shprehur se do të mbajë mandatin deri në vitin 2021.
