Në një kohë ku në Ballkan po flitet se po rritet ndikimi rus, në takimin mes tyre, dy ministrat u ndalën pikërisht tek situata e sigurisë në Ballkan dhe tek mbështetja që Shqipëria i ka dhënë dhe vijon t’i japë integrimit të Malit të Zi në NATO.
Ministri Boskoviç përmendi rastin e atentatit të dështuar ndaj ish-kryeministrit Gjukanoviç, pas të cilit dyshohet se fshihen faktorë rusë.
“Kur bëhet fjalë për ndikimin rus është i pakundërshtueshëm fakti që forca të sigurisë ruse janë përpjekur që të ndërhyjnë në mënyrë të dhunshme në zgjedhje dhe me këtë çështje merren sistemet institucionale malazeze. Por ne jemi të gatshëm dhe do të përpiqemi dhe do të punojmë për ta zgjidhur këtë çështje.
Ajo që na shqetëson ne është me të vërtetë rajoni, që gjithmonë ka qenë një problem dhe ka patur probleme destabiliteti gjatë gjithë historisë që njohim. Dhe në këtë rajon nuk jetojnë rusët, jetojmë ne dhe ne jemi më shumë të interesuar për të mos krijuar konflikte në rajon.” tha Boskoviç.
Nga ana tjetër ka qenë më i ashpër qëndrimi i ministres Kodheli.
“Çdokush që kërkon të ndërhyjë dhe të trazojë situatatat e sigurise të ekulibiruarta tashmë në Ballkan, dhe kur them tashmë kini parasysh Ballkanin e 20 viteve më parë që ishte shumë i trazuar, unë besoj që do të marrë përgjigjen që meriton”, tha Kodheli. (M.D/ Shuplaka)
Discussion about this post