Me fillimin e vitit 2017 ndryshon edhe mënyra e marrjes së patentës (lejes së drejtimit). Që pas datës 1 janar 2017 kushdo që do të ketë një patentë në xhep duhet të ketë kujdes detajet e mëposhtme.
Për herë të parë pritet të hyjnë patentat AM për 16 vjeçarët, ndërsa patentat për automjetet manual nuk do të shërbejnë edhe për makinat automatike sipas direktivave të BE.
“Për lejet e drejtimit me kuti shpejtësi automatike dhe manual do të jenë të ndara dhe duhet të deklarohet që në fillim për çfarë do të aftësohet. Lejet e drejtimit B do të jenë të vlefshme edhe për motomjetet deri në 125 kubikë. Procedurat administrative janë më të kompaktësuara dhe kanidatëve nuk do ti duhet të paraqesin shumë dokumentacion, ato janë të verifikueshme online. Sipas specialistit Bëxhiku, këto ndryshime nuk do të kenë kosto financiare shtesë për qytetarët”, ka thënë për Ora News specialisti për sigurinë rrugore në Ministrinë e Transporteve dhe Infrastrukturës, Nikolin Bërxhiku.
Sipas tij, “nuk ka asnjë kosto financiare sepse ata brenda programeve të tyre mënyrën si e kanë zhvilluar deri tani do të ristrukturohen, por nuk do ti kushtojë as autoshkollave dhe as drejtorisë së shërbimeve të transportit”.
Ndryshime ka pësuar edhe mënyra e testimit, ku do të ketë 40 pyetje dhe për kalimin e tij lejohen 4 gabime. Testimi do të zgjasë 40 minuta. (A.R/SHUPLAKA)
Discussion about this post