Charles Michel doli me planin e fundit për të rrëzuar Ursula von der Leyen nga posti i presidentes së Komisionit Evropian, organit më të rëndësishëm ekzekutiv të Bashkimit Evropian. Presidenti i Këshillit Evropian i prezantoi liderëve të BE-së idenë se kryeministri grek, Kyriakos Mitsotakis duhet të marrë postin e Von der Leyenit, thanë për Politico pesë diplomatë dhe zyrtarë anonimë evropianë. Deri më tani, shanset janë në favor të Von der Leyenit, por kjo nuk e ka penguar Michelin të përpiqet të shtyjë një ‘komplot’ kundër saj.
Diplomatët dhe zyrtarët e quajtën atë një përpjekje tjetër të dëshpëruar për të rrëzuar Von der Leyenin. Përveç kësaj, Michel dyshohet se sugjeroi prapa dyerve të mbyllura që kryeministrja daneze, Mette Frederiksen mund të ishte një presidente më e mirë e Këshillit Evropian sesa ish-kryeministri portugez, Antonio Costa, i cili preferohet nga Von der Leyen dhe emri i të cilit përmendet më shpesh në kontekstin e marrjes së postit të Michelit.
“Edhe një herë, ky është lajm i rremë dhe gënjeshtër. Presidenti u konsultua me të gjithë liderët individualisht për procesin e ndarjes së funksioneve. Presidenti nuk përmendi emra konkretë në këtë fazë”, tha Ecaterina Casinge, zëdhënëse e Charles Michel.
Michel është përgjegjës për udhëheqjen e një marrëveshjeje politike midis liderëve evropianë për emërimin e kreut të Komisionit Evropian, Këshillit Evropian, Parlamentit Evropian dhe degës së politikës së jashtme të BE-së pas zgjedhjeve evropiane. “Nuk ka asnjë rol për Michelin në këtë proces, përveç asaj në kokën e tij”, pohoi një diplomat i BE-së. Në ditët pas zgjedhjeve, u shfaq një konsensus midis 27 krerëve të shteteve dhe qeverive që Von der Leyen duhet të marrë një mandat të dytë dhe se Costa duhet të jetë presidenti i ri i Këshillit Evropian. Marrëdhëniet e mira personale mes të dyve ndihmuan në këtë, veçanërisht pas vitesh konflikti midis Michel dhe Von der Leyen.
Discussion about this post