Disa ditë pasi pala greke dërgoi në Shqipëri dosjen voluminoze në ngarkim të Klement Balilit, ose siç njihet ndryshe “Eskobari i Ballkanit”, prokuroria shqiptare ka regjistruar dy procedime penale në ngarkim të tij: atë të grupit të struktuar kriminal dhe trafikut ndërkombëtar të lëndëve narkotike.
Ndërkohë, bazuar në ligjin Antimafia, po hetohet edhe pasuria e Balilit, të cilit ende nuk i dihet vendndoshja.
Prokurorët e Task Forcës pranë Krimeve të Rënda po identifikojnë pasuritë e Klement Balilit dhe llogaritë e tij bankare për t’ju drejtuar më pas Gjykatës me kërkesën për sekuestro deri në përfundim të hetimeve ndaj tij.
Organi i akuzës nuk informon se kur do t’i drejtohen gjykatës për masën e sigurisë ndaj Balilit, i cili, sipas sistemit TIM, rezulton se në 22 mars ka kryer një udhëtim 1-ditor në Malin e Zi.
