Ditën e sotme në Prokurorinë e Përgjithshme, në një takim të zhvilluar me Prokurorin e Përgjithshëm, Olsian Çela, dhe në prani të Drejtuesit të SPAK, Altin Dumani, u prezantuan prioritetet e Këshillit të Ministrave për luftën kundër kriminalitetit për vitin 2025.
Ulsi Manja në një postim në rrjete sociale u shpreh se, qeveria shqiptare riafirmon angazhimin e saj për të garantuar kushte optimale funksionimi për Prokurorinë e Përgjithshme dhe për Strukturën e Posaçme Antikorrupsion (SPAK), duke respektuar në mënyrë të rreptë pavarësinë institucionale.
Në takim u theksua se rekomandimet e qeverisë janë të qarta: të rritet efikasiteti i hetimeve, të sigurohet më shumë transparencë dhe përgjegjshmëri institucionale, si dhe të ndërtohet një besim i qëndrueshëm i qytetarëve ndaj drejtësisë.- thuhet në postimin e Ministrit Manja.
“Ne qëndrojmë krah drejtësisë, jo për ta drejtuar atë, por për të fuqizuar pavarësinë e saj. Prokurorët duhet të ndihen të lirë dhe të mbështetur për të kryer detyrën e tyre me profesionalizëm dhe integritet, ndërsa krimi nuk duhet të ndiejë asnjë hapësirë për të vepruar,” u theksua gjatë prezantimit.
Ky takim nënvizoi rëndësinë e vijimit të reformës në drejtësi dhe të përpjekjeve për luftën kundër korrupsionit dhe krimit të organizuar, si elementë të rëndësishëm për forcimin e shtetit ligjor dhe avancimin e procesit të integrimit evropian.
