Policia e Shtetit ka reaguar pas incidentit që thuhet të ketë ndodhur tri ditë më parë në qytetin e Korçës, ku qytetari Niko Dinko u ankua për dhunimin nga policia dhe garda. Në një reagim për një portal online të përditshëm, zëdhënësi i Policisë së Shtetit, Genti Mullai, sqaroi se qytetari nuk është dhunuar por thjesht është këshilluar.
“Nisur nga disa shkrime te publikuara në portalet online, ku pretendohet se një qytetar në qytetin e Korçës, është dhunuar e goditur në automjetin e Policisë nga Shefi i Seksionit të Rendit, në Komisariatin e Policisë Korçë, Mariglen Jaçellari, ju informojmë se:
Më datë 24.12.2016, rreth orës 13:20, gjatë vizitës që Kryeministri ka kryer pranë “Muzeut Kombëtar të Artit Mesjetar” në qytetin e Korçës, një qytetar konkretisht shtetasi Niko Ndini nga ana tjetër e rrugës, (në trotuar) filloi të bërtasë e të përdorë fjalë fyese në drejtim të Kryeministrit, duke u bërë shqetësim për pjesëmarrësit e tjerë.
Në këtë moment, drejt qytetarit janë afruar shërbimet e Policisë dhe shoqëruesit e Kryeministrit të cilët e kanë këshilluar qytetarin, që të mos vijonte me këtë sjellje e të mos bërtiste.
Theksojmë se ky shtetas nuk është dhunuar nga asnjë punonjës Policie dhe as nuk është shoqëruar në ambientet e Komisariatit të Policisë Korçë”, ka bërë të ditur zëdhënësi i policisë.
Ky reagim i policisë vjen pas denoncimit të qytetarit 53-vjeçar, ka treguar se kur pa kryeministrin Rama që po shkonte në drejtim të Muzeut të Artit Mesjetar, iu afrua dhe i foli kundër qeverisjes së tij e pro qëndrimit të Blushit. Qytetari Dinko është shprehur se pas kësaj u dhunua nga efektivët brenda automjetit të policisë. (XH.A/SHUPLAKA)
