Shkëlzen Berisha ka reaguar për shkarkimin e Haki Çakos nga detyra si drejtor i Përgjithshëm i Shtetit. Ai është shprehur se ky shkarkim është njësoj si shprehja: “S’ke c’i ben gomarit, e i bie samarit”.
“Shkarkimi i Çakos si shprehja: S’ke c’i ben gomarit, e i bie samarit!”, shprehet Shkëlzen Berisha. Çako u shkarkua mëngjesin e sotëm me arsyetimin nga Ministri Fatmir Xhafaj se duhet një ritëm më i shpejtë dhe më dinamikë në punë.
Për këtë arsye sipas tij ishte i domosdoshëm një lidership i ri, me energjitë të reja për të motivuar dhe çuar përpara punën e Policisë së Shtetit.
DETAJET E MINISTRISË SË BRENDSHME:
Me propozim të Ministrit të Brendshëm, zotit Fatmir Xhafaj, Këshilli i Ministrave miratoi lirimin nga detyra të Drejtorit të Përgjithshëm të Policisë së Shtetit, Drejtues Madhor Haki Çako.
Ministri Xhafaj, vlerëson kontributin, angazhimin dhe përkushtimin e zotit Çako në drejtimin e Policisë së Shtetit, gjatë viteve të fundit. Ai ka një karrierë të gjatë në Polici dhe ka drejtuar me profesionalizëm struktura të niveleve të ndryshme.
Ministri Xhafaj, pati një takim gjatë të cilit e falënderoi Drejtues Madhor Çakon për punën dhe bashkëpunimin e deritanishëm, në përmbushjen e misionit të Policisë së Shtetit.
Megjithatë, realizimi i objektivave të këtij mandati qeverisës, në fushën e rendit dhe sigurisë publike, sfidat që e presin Policinë e Shtetit, kërkojnë një ritëm më të shpejtë dhe dinamikë të madhe pune. Për këtë arsye është i domosdoshëm një lidership i ri, me energjitë të reja për të motivuar dhe çuar përpara punën e Policisë së Shtetit.
Puna e kësaj të fundit, domosdoshmërisht duhet të jetë e orientuar drejt rezultateve konkrete, me qëllim që t’u përgjigjet, kësisoj, më mirë kërkesave të kësaj faze të re dhe pritshmërive të larta të publikut dhe partnerëve ndërkombëtarë ndaj Policisë së Shtetit. (J.V/Faxweb)
Discussion about this post