Këshilli i Lartë i Drejtësisë ka nisur së fundmi hetimin ndaj gjyqtarëve të Gjykatës së Apelit për Krimet e Rënda.
Ky vendim është marrë pasi 5 gjyqtarët vendosën të shpallin të pafajshëm 11 anëtarët e bandës “Hakmarrje për Drejtësi” me në krye vëllezërit Oert dhe Leart Shyti.
KLD do të gjykojë veprimtaritë gjyqësore të pesë gjyqtarëve të dosjes “Hakmarrja për Drejtësi”, konkretisht të: Alaudin Malaj, Artur Kalaja, Sotiraq Lubonja, Etleva Temo, Stavri Kallço.
“Nga shqyrtimi paraprak i ngjarjes së transmetuar dhe nga shqetësimi i ngritur nga Presidenti i Republikës, njëherazi kryetar i Këshillit të Lartë të Drejtësisë, u konstatua se ka vend që Inspektorati i KLD-së, të verifikojë veprimtarinë gjyqësore të gjyqtarëve të Gjykatës së Apelit për Krime të Rënda Tiranë, Alaudin Malaj, Artur Kalaja, Stavri Kallço, Sotiraq Lubonja dhe Etleva Temo, për akte dhe sjellje që diskreditojnë rëndë figurën e gjyqtarit në funksion të zgjidhjes së parregullt të një çështjeje gjyqësore penale” bën me dije KLD.
Një ditë më parë, ata shpallën të pafajshëm shtetasit: Orik dhe Leart Shytin, Altin Arapin, Dritan Hatën, Gent Cakën, Nikolin Pashaj Novruzaj, Gëzim Gjoni, Kreshnik Spahiu, Roland Shyti, të akuzuar për 17 vepra penale, ndër to: vendosja e bombës tek një supermarket pranë 9-katësheve, vrasja e ish-drejtorit të Burgjeve, Bujar Kaloshi, vjedhje të bankave të ndryshme dhe arkave të shtetit.
Ky vendim i papritur u ndoq nga reagime të shumta si ai i ish-kryeministrit Sali Berisha dhe kryedemokratit Lulzim Basha, të cilët akuzuan Ramën se shpalli të pafajshëm djemtë e xhelatit komunist, por dhe nga deputetë nga radhët e PD-së dhe PS-së.
I menjëhershëm ishte edhe reagimi i vajzës së ish-drejtorit të Burgjeve Bujar Koloshi, e cila shkroi se ia vranë për herë të dytë babanë.
Ndërsa Orik Shyti u shpreh pas vendimit të Apelit se janë të pafajshëm “për të gjitha akuzat e ngritura djallëzisht dhe të mbrojtura egërsisht nga Sali Berisha”. (XH.A/SHUPLAKA)
Discussion about this post