Shtyhet pretenca për Klement Balilin. Shkak i shtyrjes së pretencës për Balilin ishte mungesa e avokatit të tij mbrojtës Theodhori Sollaku. Avokati mbrojtës i Klement Balilit, Theodhori Sollaku ka dorëzuar një raport, duke justifikuar mungesën e tij për arsye shëndetësore.
Pretenca për Balilin është shtyrë për në datën 26 mars, ndërsa kujtojmë se atij i është pranuar kërkesa për gjykim të shkurtuar, ç’ka nënkupton uljen me 1/3 e dënimit.
Mbi Balilin rëndojnë akuzat për “Trafikim të lëndëve narkotike në bashkëpunim, “pjesëmarrje në grupin e strukturuar kriminal”, “Refuzim për deklarim, mosdeklarim, fshehje ose deklarim i rremë i pasurive”, si dhe për “Pastrim parash”.
Pas pothuajse tre vitesh arrati, i cilësuari si “Eskobari i Ballkanit”, Klement Balili u vetëdorëzua më 15 janar të këtij viti, vetëm disa javë më para se dosja e tij penale u dërgohej për gjykim. Ai mohon të jetë përfshirë në veprimtari kriminale dhe këmbëngul për pafajësi.
