Kompania franceze e qumështit “Lactalis” është duke tërhequr 12 milionë kuti qumështi pluhur për bebe pas një skandali të fshehur nga kompania.
Lajmi është bërë i ditur nga drejtori ekzekutiv, Emmanuel Besnier, i cili ka konfirmuar shkallën e rrezikut, ku mbi 12 milionë kuti qumësht janë me përmbajtje salmonele.
“Ne duhet të marrim parasysh shkallën e këtij operacioni: më shumë se 12 milion kuti janë të prekura,” tha ai, duke shtuar se shpërndarësit duhet t’i tërheqin nga raftet.
“Ata e dinë se çdo kuti e ndotur duhet të hiqet nga rafti”. Ministri i Financave, Bruno Le Maire, tha se kompania do të tërheqë nga tregu të gjitha produktet e qumështit të prodhuara në fabrikën e saj Craon që janë ende në depo dhe nëpër raftet e dyqaneve, pavarësisht nga data e prodhimit.
“Qëllimi i këtij hapi radikal është i thjeshtë: për të shmangur vonesat, problemet në ndarjen e grupeve dhe rrezikun e gabimit njerëzor”, tha Le Maire. Masat e ashpra pasqyrojnë zhgënjimin e nivelit të lartë në trajtimin e krizës, pasi supermarketet më të mëdha franceze – duke përfshirë kanë deklaruar se pavarësisht kontrolleve ky qumësht ende gjendet në raftet e tyre.
“Unë nuk mund të garantoj sen asnjë kuti nuk ndodhet në supermarkete. Prandaj kjo masë, është garancia më e fortë që mund të japim”, tha ministri.
Qindra padi janë ngritur kundër kompanisë nga familjet që thonë se fëmijët e tyre janë helmuar nga salmonela pas pirjes së qumështit të pluhur nga produktet e kësaj kompanie.
Deri më tani, zyrtarët francezë kanë raportuar 35 raste të foshnjave që kanë marrë salmonelë nga ky qumësht pluhuri, ndërsa një rast është raportuar në Spanjë dhe një tjetër është duke u hetuar në Greqi.
Drejtuesi ekzekutiv i kompanisë, ka premtuar kompensim për të gjitha familjet e prekura dhe tha se pasojat e kësaj krize shëndetësore për konsumatorët, janë në përparësi për “Lactalis”.
“Ka ankesa dhe do të ketë një hetim me të cilin ne do të bashkëpunojmë plotësisht, “tha Besnier.
Produktet e “Lactalis” përfshijnë gjalpin President, “Galbani Riçota” dhe djathin mocarela në Itali.
Ka 246 vende prodhimi në 47 vende të botës. Dy nga markat e saj, qumështi Picot dhe Milumel, u tërhoqën fillimisht nga tregu pasi ishin pjesë e skandalit në mes të dhjetorit pasi dhjetëra fëmijë u sëmurën. Skandali u thellua këtë muaj, kur gazeta investigative franceze “Le Canard Enchaine” raportoi se inspektorët franceze kishin dhënë rezultate të pastra për këto produkte.
Testet e Lactalis nuk u dërguan tek autoritetet franceze duke fshehur skandalin. Kompania tha se nuk ishte ligjërisht e detyruar të raportonte ndotjen me salmonelë. Ky skandal përfshin 83 vende të botës.
Burimi: The Guardian Përshtati në shqip: (F.G/Faxweb)
