SHBA-ja i kërkoi Koresë së Veriut të shmangë çdo veprim provokues, pas një deklarate të drejtuesit koreano-verior, i cili konfirmonte se Pheniani ishte në etapat e fundit para testimit të një rakete balistike ndërkontinentale.
Në fjalimin e tij me rastin e Vitit të Ri, Kim Jong-Un theksoi se vendi i tij kishte fituar në vitin 2016 “statusin e fuqisë bërthamore” duke u bërë kështu “një fuqi ushtarake që edhe armiqtë më të fuqishëm nuk do të mund ta prekin”. “Ne i kërkojmë Koresë së Veriut të shmangë çdo veprim provokues dhe çdo retorikë nxitëse që kërcënojnë paqen dhe stabilitetin ndërkombëtar”, theksoi një zëdhënës i Pentagonit, Gary Ross.
Pheniani duhet të bëjë zgjedhje strategjike për të përmbushur angazhimet e tij ndërkombëtare”, nënvizoi ai duke shtuar se shumë rezoluta të Këshillit të Sigurimit të OKB-së ndalojnë Korenë e Veriut të realizojë teste të raketave balistike. Pentagoni u kërkoi gjithashtu të gjitha shteteve të përdorin çdo mjet influence për të shpjeguar qartë se testet duke përdorur teknikën e raketave balistike janë të papranueshme dhe se në disa raste këto teste mund të kenë pasoja. (E.K/SHUPLAKA)
Discussion about this post